تابع المرحلة الخامسة :استلام المحارة

يقصد هنا عند انتهاء العامل من المحاره وقيامه بتمتير الشقه( قياسها )..



فى هذه المرحله يفضل عدم قيامك بالاستلام بنفسك....



بمعنى...



عند الاتفاق مع عامل المحاره أخبره بأن الاستلام سيكون بمعرفه مهندس...  وفصل الخطاب هنا انه لو صنايعى وفاهم شغله مش هيقلق لو هيستلم منه كبير مهندسى القطر المصرى....لكن الافضل الاتفاق من الاول...



عند الاستلام بقى..



يفضل الإستعانه بمهندس فإن لم يتوفر فبفنى خبره او مقاول محاره او مقاول تشطيب فى الاستلام لأكتر من سبب..



اولا المهندس هيبقى فاهم هو بيستلم ايه وازاى يستلم...



لو انت خجول ومبتعرفش تتعامل مع الصنايعيه خاصه لو الصنايعى كبير فى السن هيترفع عنك الحرج..ومش هيقدر يضحك على المهندس وياكله بالكلام ..



التمتير ليه قواعد منعرفهاش إحنا...إزاى؟؟



مثلا الابواب والشبابيك....



العامل هيضرب طول فى عرض ومش هيخرج الفراغات زى الابواب والشبابيك..عادى ...هيقولك ان السوك بتاخد مجهود وبتاع لكن فى الواقع الحساب بيبقى إزاى؟؟

الابواب بتتحسب من جهه واحده...إزاى برضو؟؟



فوق الباب بيبقى فى حته حوالى متر لغايه السقف حائط يبقى الجهتين حوالى اتنين متر...اللى هو طول الباب مجازا..لو انا او انت اللى بيستلم هتدفع فى الباب ده مرتين لانه هيقيس الحائط مره من جوه الغرفه ومره من بره الغرفه لكن المهندس هيحاسبه من ناحيه واحده ومش هيحسب المتر اللى فوق الباب من الناحيه التانيه...ده مثال للفرق فى الحساب...



يعنى اتعاب المهندس او المقاول هيا نفسها اللى هيوفرهالك فى الحساب تقريبا..



الاستلام بيكون بالذراع الالومنيوم (الإده ) بوضعها على الحائط بزاويه 45 درجه ووضع مصدر إضائه فى الجانب الاخر ومراقبه مسار الحائط فى حاله وجود ارتفاعات او انخفاضات فى الحائط سيظهر النور فى منطقه التقاء الذراع مع الحائط (بيسموها الإده نورت) وتعالج فى حاله الارتفاع بالتكسير واعاده المحاره وفى حاله الانخفاض بلتخشين والمحاره كذلك لحين استواء السطح...



كذلك لإظهار الميول فى الحوائط يوضع ميزان المياه على الذراع بشكل موازى وملاحظه الميزان لمعرفه الميول من اعلى لأسفل...ويلاحظ هنا الاهتمام بالميول الرأسيه فقط كون الميول الافقيه شائعه لكون الحوائط غير عموديه على بعضها (مشطوره بلغه الصنايعيه) ولكن يهتم بها فى حال كون الحوائط عموديه على بعضها...



فى حاله عدم القدره على توفير مهندس او مقاول او الرغبه فى التوفير او ما شابه حنعمل الاتي:


المرحله دى بعدها الفورم الجبس والكرانيش والدهانات..



تجيب النفاش وبتاع الكرانيش يستلموا الشقه من بتاع المحاره...



تأكد على النقاش انك هتستلم منه هوه وملكش دعوه والحيطه لو مش زى الإزاز هتخليه يسحب ولو عشر سكاكين معجون بنفس المصنعيه وملكش دعوه...(طبعا ده تهويش بس...عشر سكاكين؟!!..ينهار اسود!!)..



وبتاع الكرانيش ..تأكد عليه انك عايز الكرانيش على الحيط لطش مش عايز تربيات من تحت...يعنى الحيطه تبقى متساويه زى المسطره...



وإن كنت بفضل ان الواحد يستعين بمهندس للإشراف فقط.....والمتابعه...وفى النقطه دى هقول ملحوظه...



فى حاله رغبتك فى مقاول او مهندس يريحك من التعامل مع الصنايعيه ووجع الدماغ قدامك 3 إختيارات....



اول حاجه

مهندس او فنى للإستلام...



وده بيحاسبك بالزياره زى الدكتور.لكن ملوش دعوه بالشغل معمول صح ولا غلط قبل كده..والاختيار ده لو عندك عامل معرفه و موثوق فيه وامين جدا جدا..



تانى حاجه



إشراف وإستلام. .



يعنى يشرف على الشغل بزياره للموقع كل يوم او يوم ويوم لمتابعه الشغل والتاكيد على تصحيح الاخطاء وكركبه بطن الصنايعيه..والاستلام فى الاخر..



وده يوفر عليك التكسير واعاده التشغيل ان وجد وكان العامل مش قد كده..



وده لو جايب عامل بتزكيه حد غريب او حد معرفه ومتعاملتش معاه قبل كده..



واتعاب المهندس بتكون فى حدود 10 الميه من التكلفه يعنى لو المحاره مثلا هتكلف 15000 هياخد 1500 جنيه.



تالت حاجه..



اشراف وتنفيذ..





يعنى المهندس هيشرف ويسلمك ويجيب العمال بمعرفته والمون والخامات..



ودى بتكون اتعابه من 10 الى 15 الميه من التكلفه طبعل وبيحاسبك على المصنعيه عادى...بمعنى...



لو هيجيب عمال بالمتر او اليوميه مش هتفرق انت هتحاسب بالمتركأن الصنايعى من بره وهتدفع تمن الخامات والنقل والمشال وكل حاجه...





الاختيارات دى تتوقف عليك انت ورغبتك......ولك الاختيار...





كده احنا خلصنا المحاره ..واستلمنا من المحار وهندخل المرحله اللى بعد كده..


....الجبس والمصيص...و تركيب الفورم والكرانيش....