المقصود بالنجاره هنا..
هيا النجاره المتعلقه بالتشطيب...يعنى باب الشقه وابواب الغرف والشبابيك....
يجب هنا تحديد الخامه المستخدمه فى الابواب والشبابيك....
فى هذه المرحله كل ما يهمنا تركيب الاطار الخاص بالابواب والشبابيك فى ما يتعارف على تسميته (.. الحلوق..)
تنقسم النجاره الى ...
-باب الشقه...
فى حاله عدم وجوده حال استلام الشقه...ويمكن تركيب باب خشبى او باب خشبى وباب حمايه حديدى أو كما ظهر مؤخرا ابواب مصفحه من معدن بها كوالين فى كل الاتجاهات وزوده بالعين السحريه ومدهونه وعده للتركيب بدون اى دهانات او تجهيز ويتراوح اسعارها من 750 الى 1500 جنيه وهيا بالطبع ...صينى!!...
-ابواب الغرف...
ويمكن الاختيار بين باب خشب او باب الوميتال...
وإن كان رأيى الشخصى أن الباب الخشبى أشيك وأقيم وأطوع فى التشكيل مما يعطى مساحه اكبر لتعدد الاشكال والموديلات..فيوجد ابواب غرف مصمته تسمى ابواب حشو وابواب مفرغه تسمى ابواب سلسله
سنفترض اختيار الباب للغرفه باب خشبى.
ويمكن بعد إختيار الباب الاستعانه بالنجار لتركيب الحلوق مع الاخذ فى الاعتبار الملحوظات التاليه..
الإطار أو الحلق يكون بسمك 2 بوصه اى 5 سم...عرض الحلق يكون غالبا 90 سم..طول الحلق يكون فى حدود 225 سم وبعمق 15 سم علما بان متوسط طول الباب يكون 210 سم ولكن الحلق يكون اطول لكون الحلق يتم تركيبه بطول الباب قبل تركيب الارضيه او السيراميك ويتم تثبيته فى الجدار بواسطه قواطع حديديه تربط بالمسامير فى الحلق من جهه ومن الجهه الاخرى تدفن بالحائط (كانات ) من الجهات الثلاثه والارضيه تعتبر عامل تثبيت للحلق من اسفل...
يراعى عند شراء الحلق مراعاه المقاسات وخلو الخشب من العيوب الظاهره والشقوق والكسور واستقامه القوائم .
ويراعى عند التركيب...
ان يقوم النجار بمراعاه ميزان الحلق اى استخدام ميزان الماء فى تركيب الماء بشكل عمودى على الارض ومستقيم حتى ولو وجد ميل فى الحائط.
يراعى النجار بروز الحلق عن مستوى الجدارومراعاه وجود بروز او ميل فى الجدار وكذلك الطبقه الناتجه عن المحاره ليصبح الباب مستوى مع المحاره فيما بعد؟
فى حاله وجود أكتر من باب فى نفس الجهه يقوم النجار بموازنه الابواب بميزان خيط وميزان ماء ليكون الابواب كلها فى مستوى واحد مع المحاره
يقوم النجار بعمل عارضه خشبيه بنفس عرض الحلق من أسفل وذلك كون الجزء السفلى من الحلق حر الحركه وليس محكوم كالجزء الاعلى وبالتالى يكون الجزء السفلى عرضه للنضغاط بفعل تمدد المحاره ويصبح الباب متسع من اعلى وضيق من اسفل..
....تركيب الشبابيك..
تنقسم الشبابيك الى
- خشبيه والتى تنقسم بدورها الى
ما يعرف بمكوناته الثلاثه...شيش وزجاج وسلك
او ..شيش وزجاج فقط أو.. زجاج فقط (سلسله ) .
-الوميتال وينسم لعده قطاعات منها السعد والعربيه وتكنو وجامبو وتانجو وبى اس و....
- شبابيك ال upvc وهى خامه جديده مستحدثه فى عالم الشبابيك وسنتحدث عنها بالتفصيل فى حينها...
ما يهمنا الان فى هذه المرحله هو الاطارات..أو الحلوق....
فى حاله الرغبه فى تركيب شبابيك خشبيه يتم تركيب حلوق مفرزه وهيا تشبه حلوق الابواب وتشترك معها فى نفس الملحوظات السابقه..
وفى حاله تركيب شبابيك الوميتال يجب تركيب حلوق غير مفرزه او مستويه يتعارف على تسميتها بالحلوق الزفره (أه والله) ..وهنا يمكن الاكتفاء بإطار ذو سمك أقل كالواحد او الواحد وربع او الواحد ونصف بوصه..
أما فى حاله تركيب ال يو بى فى سى فلا يتم تركيب حلق من اساسه حيث انها تركب على المحاره لوجوب عزلها بماده الفوم والسيليكون والسيلكا و كيماويات اخرى ..لزياده مستوى العزل المطلوب.
ليست هناك تعليقات:
إرسال تعليق